Hverfiskráin okkar er við Reykjavikgade. Hún heitir Isbjørnen.
Þar eru öskubakkar á hverju borði og hundamatur á gólfinu. Stór bjór kostar 20 krónur nema á þriðjudögum og fimmtudögum kostar hann 18 krónur.
Á Ísbirninum er alltaf sama fólkið. Þessi hnefaleikakappi kemur víst þangað oft en ekki höfum séð hann ennþá.
Nú hafa tveir stórir húsnæðislánasjóðir í Bandaríkjunum verið þjóðnýttir - hvað segir þetta um málflutning þeirra sem vilja leggja niður Íbúðarlánasjóð?
Árið 2007 þrefaldaðist fjöldi óbreyttra borgara sem létust í loftárásum NATO í Afganistan. Svar hernaðarbandalagsins: Fjölga loftárásum.
Mannfll í röðum óbreyttra borgara er ekki ófyrirséð hliðarafurð af svona lofthernaði. Þvert á móti er margsannað að það er óhjákvæmileg afleiðing. Gallinn er bara sá að Vesturlöndum er nákvæmlega sama þótt konur og börn séu fórnarlömb hernaðar þeirra í Afganistan. Þegar einn hermaður fellur er næg umfjöllun um það í blöðunum en þegar sprengjum er ringt yfir venjulegt fólk í Afganistan eru tuggnar upp fréttatilkynningar frá NATO-herjunum það sem fólkið er kallað „vígamenn“ og „Talibanar“. Það er ekki nema þegar heimamenn ná eyrum mannréttindasamtaka og afgönsku ríkisstjórnarinnar að þessi morð á óbreyttum borgurum eru tekin á dagskrá, en niðurstaðan er alltaf sú sama. NATO-herirnir skipa nefnd til að gera skýrslu um málið og reyna að salta fréttir af því í nokkrar vikur þangað til drápin hætta að vera harmleikur og verða að tölfræði.
Þegar svo allt er að fara úr böndunum í Afganistan hafa viðbrögð Bandaríkjanna og fylgiríkja þeirra jafnan verið hin sömu: Ráðast inn í annað land. Árið 2003 var það Írak, núna er það Pakistan.
Hver treystir lánasjóðum sem heita svona asnalegum nöfnum?
Konan mín vill ekki hafa svínakjöt í jólamatinn því það er „ekki kosher“. Það er svo margt rangt við þessa röksemdafærslu að ég veit ekki hvar ég á að byrja.
Ólympíuleikar fatlaðra eru hafnir. Á 9. áratugnum var fylgst allsæmilega með þeim á Íslandi en ég veðja ekki á að það verði gert núna.
Norðurlandaþjóðirnar voru friðsamar í kvöld, en Íslendingar skoruðu þó mörk. Það var meira en Dönum og Svíum tókst að gera.
Hérna á Gunnlaugsgötu var hægt að fylgjast með öllum leikjunum í einu. Það var ekki leiðinlegt.
Einu sinni voru einu konurnar sem hlutu frama í þriðja heiminum ekkjur fyrrverandi ráðamanna. Núna er jafnréttið meira og karlarnir komast til áhrifa út á látnar eiginkonur. Þetta gildir um Asif Zardari sem núna er orðinn forseti Pakistan enda þótt hann sé alls ekki sá maður sem nýtur mests stuðnings þjóðarinnar. Í frétt RÚV er þetta orðað svo:
„Í Pakistan er forsetinn kosinn af þjóðþinginu og fjórum héraðsþingum og var Zardari kosinn með miklum meirihluta atkvæða. Samkvæmt Gallup-könnun nýtur Zardari hins vegar aðeins stuðnings um fjórðungs Pakistana í embætti forseta.“
Zardari er alræmdur fyrir spillingu og hann virðist ekkert sérstaklega heiðarlegur í viðskiptum við aðra stjórnmálamenn. A.m.k. sakar Nawaz Sharif, sem líklega er vinsælasti stjórnmálamaðurinn í Pakistan, hann um að hafa svikið heiðursmannasamkomulag um að hvorugur þeirra ætti að sækjast eftir forsetaembættinu.
Skoðanir Söru Palin á ýmsum málum eru mjög athyglisverðar, t.d. að innrás Bandaríkjanna í Írak sé gerð í umboði Guðs.
Miðað við ferilinn í umhverfismálum er hins vegar Sara á sömu blaðsíðu og hin álóða ríkisstjórn Íslands.
Var ræða John McCain á flokksþingi versta ræða forsetaframbjóðanda í Bandaríkjunum frá upphafi vega? Kannski ekki, en hún fór mjög nærri því.
